添馬男 - 不斷尋找敵人

中門大開   香港蘋果日報   2014年3月6日

為咗解釋梁振英低殘民望，究竟仲要犧牲香港幾多自由，包括言論、新聞及學術自由，先可以令梁可以自圓其說呢？起初老董年代就歸咎名嘴、泛民及外國勢力，搞出五十萬人上街，但出奇地當中央糾正左傾錯誤，踢走老董後，一切又回復正常，曾蔭權上場，又唔見有媽叉媒體、泛民及外國勢力，即使落台前一年民望低殘，亦唔見有親北京勢力指乃鍾庭耀民調玩嘢。

鍾庭耀成最新代罪羔羊

梁振英競選時，鍾庭耀民調幫咗佢好大忙，當時佢民望大幅領先醜聞纏身嘅唐英年，由於民調有公信力，令人相信梁振英有民意基礎上台，當時點解又冇人撲出嚟指摘鍾庭耀亂搞不可信呢？當梁開始因僭建醜聞曝光，民望下跌，一路沉冇起色，加上管治水平太低，令普羅大眾失去政治信任。但無論北京或梁本人，都唔願意面對現實，承認呢個係政治失敗，而且仲係大失敗。於是為失敗不斷找尋代罪羔羊。

第一個當然係前朝政府及官僚集團，將自己政策上無能歸咎於前朝，而最受針對當然係政務官，因為是政客推卸責任最佳藉口，方便就手。結果奪取財政司財務控制大權，將政務官一套行之有效嘅方法打倒，甚至將土地開發緩慢、規劃程序需時歸咎於官僚，亦因此才有香港速度，「成熟一項推出一項」呢種超低能做法。

第二大敵人係傳媒，因為梁係靠傳媒力量對付唐英年，用醜聞打敗佢，自然知道傳媒效用好大。可惜蜜月期大短，到《明報》掉轉槍頭爆佢僭建醜聞開始，媒體對佢失去信任，前線記者更認為當日受騙，於是一面倒由挺梁變成反梁。呢種氛圍令梁要用鬥爭思維去應對，因此才有邵善波在立法會一番政府要打全方位輿論戰嘅說法，而且手段越來越出位，《信報》率先受整頓，換上聽話郭艷明，然後輪到《明報》調走劉進圖，商台粗暴解僱李慧玲、抽《am730》廣告，又迫英資抽《蘋果》廣告，而劉進圖遇襲重傷，就係在此背景下發生。

第三大敵人係學者，因為當梁競選時，亦曾得到部份學者支持，尤其係環保界及社會政策研究人員，同記者一樣，當大家發現梁醜聞時，便全線反枱，冇一個敢再公開挺梁。當時梁將原本交UGC審批錢之公共政策研究經費，收回中策組手上，目的當然係唔想親泛民學者得到研究經費。現時公開砌鍾庭耀民調，只不過係舊調重彈，將過去攻擊鍾之言論，借兩會再開火。

梁振英要穩住權力，必須要令香港不斷分化，陷入政治鬥爭漩渦之中，方法就係不斷找尋新敵人，挑起新矛盾，向北京證明香港在美國重返亞洲戰略下，已受英美操控，係鬥爭前線，咁樣北京又點敢唔支持梁振英繼續當特首呢？

PS.梁之政治手段，由梁小姐評議劉進圖事件可見一斑，當初引起爭議，就算我當係梁小姐個人意見，並非由梁振英指使，但當事情鬧大，梁振英理應會叫佢shut up，但梁小姐反而借《信報》去發表有人借劉進圖事件反政府，呢一步肯定係特首辦幕後心戰工作，借《信報》及梁小姐去發表政治訊息。