添馬男 - 悲哀的「菲律賓同學會」

香港蘋果日報   2015年11月16日

香港專業精英屋企多數用菲傭，因為英文水平比印尼、泰國工人高。事實上好多菲傭都有大學學歷，但因經濟落後、工資水平相對低，先至外流做工人。菲律賓外傭學歷貨真價實，如果佢哋發現波士都係菲律賓大學博士，入學日期又可以back date，就真係笑到瞓唔着。所以話中產唔好睇小菲傭，人哋個學位係讀足咁多年先攞到。

其實，菲傭校友遍佈演藝界、政經界，甚至高等教育界，菲律賓比立勤國立大學與菲律賓太歷國立大學早已在「進修界」響晒朵，唔只建制派、明星爭住讀，紀律部隊內亦有唔少校友，生意做到開晒巷。建制派精英要包裝，源於2003年七一遊行後，中央成立港澳協調小組，當時主政香港嘅領導人曾慶紅贈於建制派八字真言：「內強質素、外樹形象。」由於七一是中產專業作反，建制派要向中產靠攏，唔可以開口埋口打工仔，於是吸納一棚似層層之專業精英，即係有專業人士背景，不過並非本地主流精英，如蘇錦樑，在加拿大做律師，在本地法律界就完全冇人識。又例如馬恩國，澳洲大狀，以粗鄙發言才為人認識。在夏威夷小村屋註冊地址的格林威治大學學士、碩士及博士全餐的葛珮帆、雙碩士讀IT卻唔知download同streaming有別，兼中英文錯漏百出的Treegun，二人分別出任中大及港大校董。問題係即使外殼執到似層層，但始終唔係本地主流精英，反而成為笑柄。

排擠精英要紅不要專

建制派一直人才貧乏，近年刻意扶持，要紅不要專，分配大量公職協助上位，於是就變成今日「菲律賓同學會」。英治時代吸納建制精英，上位過程剛好掉轉，要先成為專業精英，有往績，先至慢慢吸納，先授予普通諮詢委員會公職，有表現才上，分派重要法定機構公職，最後晉身兩局議員，成為建制派核心。

今日係先成為建制派，攞着數然後先能夠變身精英。兩者分別係英治建制派要「交單」，冇得走數，唔可以做到一鑊粥就賴反對派、港台及肥佬黎。而何承天、黃秉槐、李家祥、夏佳理、葉錫安、鄭慕智、黃匡源等人，自己本身已經在專業界別有地位及政治能量，任職大行Partner，人面廣，足以調動力量支持港府施政，當然更唔需要去讀菲律賓大學博士。今日投機分子加入建制派乃為咗走捷徑，佢靠政府多過政府靠佢，一係唔出手，一出手必定係倒米。「菲律賓同學會」中有兩位典型「精英」，洪為民及楊全盛，均來自建制IT界，用來明年砌泛民莫乃光，公職一籮但完全唔知做過乜。

北京為「人心唔回歸」而着急，但完全冇反省十幾年來用人政策，又左又窄，排擠溫和本地主流精英，形成建制派越當道掌權，政治形象越低。九七前主流年輕商界、外資企管人、大行專業人士獲港府垂青，即使做個中策組非全職顧問，已經係Something，𠵱家好人好姐中環精英邊個仲敢投身公職？當身邊建制派冇個精英，學位古靈精怪，一個學歷正常富二代劉鳴煒肯投身公職，難怪林鄭已驚為天人。

其實，走捷徑攞學位唔算悲哀，以往廠佬、乜乜總理年輕時冇學歷，靠雙手拼搏，發達後想威威，好多都係咁，悲哀嘅係制度竟然容許「菲律賓同學會」成為建制精英。