李碧華 - 小朋友的是非觀

香港蘋果日報    2012年11月27日

星期日與C茶敍，她兒子今年小三。大人談到狼英之無恥詭辯，我問問小朋友看法。

「大B，知唔知乜嘢係『僭建』？」

「知，Miss有講電視有講，即係政府未批准你就自己晌屋企加建啲唔合法嘅嘢，好似房呀牆呀花棚呀咁。」

「唐叔叔僭建咗個地下室，佢初初唔認，又搵太太認──」

「講大話！」

「於是梁叔叔當眾話佢唔啱，冇人信佢，冇資格做特首。但原來梁叔叔一早知自己都有僭建，鬧緊唐叔叔時，偷偷拆咗封咗，公開話自己冇僭建。」

「講大話！」

「俾報紙賣晒出嚟，佢成年幾之後話自己一時疏忽記錯咗──」

「救命呀好煩呀，咪又係講大話！有就有冇就冇，咁簡單使乜記喎？點會記錯喎？」

有？冇？一字咁淺，14頁聲明加一眾龜縮護短之政客同樣厚顏。狼英枉為叔叔輩，言教身教遺禍下一代。你可以侮辱香港市民的智慧，可以侮辱中央的「精明度」，但怎能侮辱中國文化？成語「開誠布公」指「以誠心待人，沒半點虛偽掩飾，對得起良心和群眾」，連澄明的小學生都瞧不起大話精。