添馬男 - 羞辱門

中門大開   香港蘋果日報   2013年12月12日

自從路姆西熱潮大爆發之後，不論性別、年齡，大家都借粗口諧音去羞辱梁振英，公眾反應可分兩派：一是盡快投人羞辱梁熱潮，搶購到路姆西者立即帶佢周圍去自拍出post，畀啲朋友睇睇；另一派認為不過係網絡小學雞行為，咁大個人仲玩粗口諧音。我係支持丟路姆西派，表面睇食粗口字係小學雞，但成件事背後意義係「羞辱」，唔係憤怒掟蕉、掟飛機、撕文件、掃枱，重點係羞辱。

比政治攻擊更有力

任何政治領導，由於掌握權力，可以動用軍警，人民總有畏懼，除非民眾已憤怒到極點，上街不畏鎮壓，就像八九年東德萊比錫市民不畏昂立克殺無赦警告，遊行至社會黨部，最後憑勇氣打倒強權。但大部份情況下，市民係冇呢種憤怒同激情。要摧毀一個政客權威，羞辱往往更有效，因此才有兜口兜面「給」蛋糕、掟番茄、雞蛋、鞋，志在羞辱。03年阿諾舒華辛力加在競選活動中蛋，件西裝污糟咗，記者問佢反應，佢話掟蛋條友仔仲欠佢一塊煙肉，大家都引述呢句以示佢嘅政治智慧，但阿諾跟手講美國民主核心價值。政客之所以要談笑用兵，唔係為咗有型，而係要避免陷入被羞辱嘅角色，因為越係疾言厲色反擊，就越反映出因被羞辱而憤怒，反而令自己陷入羞辱門之中。

最重要當公眾知道你會因被羞辱而憤怒，其他人會跟着用羞辱方式對付你，因為work，有反應。而家路姆西事件後，當梁出席公開活動時，各式各樣羞辱事件會上演。呢種集體行動會擴散，而政客甚至是軍事強人、獨裁者嘅權威會立即消失，可以講羞辱比政治攻擊、道德攻擊更有力，有一種downgrade對方功能，當人人「罵娘」時，佢講嘢仲邊有權威可言，外面冇，更大鑊係政府內部更加冇，你話點管。

緊接丟路姆西事件後，翌日輪到中大50周年晚宴，梁一上台發言，50個學生集體離場抗議，到周三西九建築雙年展活動，一班藝術家又搞路姆西飛行比賽，保安阻止進場，總之每次活動都神經兮兮，進入戒嚴狀態，因此又會引起更多衝突。而梁又會升呢對付媒體，將矛盾再擴大，令到人人厭惡為止。

政客應對羞辱行為，要反客為主，猶如拳擊手在擂台中拳，幾痛都扮冇事，仲要笑笑口攤開雙手向對方表示：「喂，乜就係得咁細力」，此乃心戰入門。當人人以丟路姆西方式羞辱梁特首時，此禁忌一打開，就返唔到轉頭。

一個內地亂譯名字嘅童玩，成為香港人集體羞辱梁振英行動，反梁已經又進入另一階段！