添馬男 - 對沖功能大貶值

中門大開   香港蘋果日報   2014年1月10日

香港商人辦報，越來越似買政治保險，用來對沖內地投資風險，所以盤數唔靚唔緊要。南洋商人走出東南亞，踏足香港傳媒業，隻眼就北望神州巿場，也容易墮入內地利益集團鬥爭之中，有說《明報》母公司涉重慶集團，搞到要用整治《明報》言論來買「贖罪券」云云。其實《明報》集團旗下其他媒體言論，早已歸邊變成「識大局睇長遠」，代表作當然係《亞洲週刊》，相信今次空降南洋商報老總來控制香港《明報》，係要將《亞洲週刊》模式加諸香港《明報》身上。

只為中國爭取話語權

《亞洲週刊》模式係以「建設性言論」為主旋律，以「國情」去處理新聞，即係有個框框。其實自查良鏞出售股權予于品海之後，已有打算將《明報》改造成類似言論模式，廿幾年來，入主《明報》者都希望用佢去leverage其他利益，包括在內地搞有線電視。張曉卿1995年收購《明報》後，同于品海一樣，發華文世界媒體夢，于想做華人CNN，張則做出版，96年由《亞洲周刊》調任《明報》主筆之魏承思，曾在上海巿委宣傳部工作，主理報社言論，咪又係將《亞洲週刊》模式引入《明報》。魏其後去亞視做新聞總監及成報當高層，乜嘢取向大家心知。

點解內地咁欣賞「《亞洲週刊》模式」，因為內地官員都睇《亞洲周刊》，認為呢種媒體可以為中國爭取話語權，提升軟實力，如果加埋《明報》，就如虎添翼。但《亞洲週刊》在香港、台灣已經冇晒市場，因為實在太老餅，台灣有《商業周刊》、《天下》、《遠見》，邊有得比，香港就一樣變成小圈子老嘢刊物，《亞洲週刊》早就變成唐人街雜誌。

問題係日報不同周刊，報紙日日要追新聞，冇咁易控制新聞取向，但要郁評論版、筆陣、世紀版及副刊專欄就易得多，如果比晒周融、張志剛、吳康民、《亞洲週刊》專欄一類言論，取締陳惜姿、蔡子強及親泛民人士言論，結果會如何呢？睇睇《亞洲週刊》在香港銷量就知。

呢種自殺式行為，不過係在《南早》、《信報》後，多一份河蟹媒體，可惜？當然會有，但時代已改變，《明報》河蟹只有加速主流媒體失去輿論導向功能，其實區家麟、呂秉權等前傳媒人離開新聞機構，用博客通過新媒體發表意見，影響力大大超過《明報》筆陣、評論版及一眾專欄作者。只不過明報招牌，對以知識分子自居者，仍有些虛榮作用。

當《明報》老闆用如此粗糙方式打爛報紙招牌，唔單止「虛榮」功能冇咗，仲變咗有異味，其對沖將功能大貶值，哈哈，真係唔知條數點計！