星期日生活 2014年8月31日
【明報專訊】近月，香港人被一片恫嚇包圍。「有票，真係唔要？」的設（反）問句出現在電視、街道、公共交通工具上——幾近無處不在。彷彿告訴香港人：你唔袋住先，大家一拍兩散。然而，袋住咩先？全國人大常委會將於今天就政改方案表決，早已甚囂塵上的「三閘」草案規定，參照目前選委會產生的提委會將維持1200人，四大界別比例不變，而特首參選人出閘須獲過半數提委會支持，候選人數目則限於2至3人。依此框架，泛民可謂無望入閘。
2010年，余若薇在與曾蔭權的政改辯論中說過一句名言：「我情願原地踏步，都唔要行差踏錯。」
但吳靄儀說，「唔袋住先，唔等於原地踏步，因為社會係唔會原地踏嘅。」
接受普選幌子 港人將「一戙都無」
前立法會議員吳靄儀日前發表文章，斷言香港並無「袋住先」的空間，必須死力撐住向方案說不。在她看來，這張票，並非實踐普選的通行證，卻可能是斷送民主的賣身契，「你以為有甲乙丙3個畀你揀？一定唔會！中央一定知佢想要甲，其他都係陪跑。（即係連利益集團板塊之爭都無埋？）無架！唔會有板塊之爭，有又點呢？其實中央一定唔會令到甲同乙有得爭，唔會話甲又好乙又好，佢係『我要呢個就係呢個人』，要百分之一百嘅安全系數。你估中央好想見到好似上一次建制派嘅人大打出手（梁唐之爭）？所以一定係董建華式選舉。有票都唔要？有票都無用！」
消息指，中央不排除提名委員會的組成有調整空間，然而吳靄儀認為，提委會絕不會開放。事實上，全國港澳研究會成員、北大教授陳端洪也曾明指，不論提委會的組成怎麼修改，都會以「愛國愛港陣營」佔大多數，確保「對抗中央」的人不能出閘。意即，提委會就是活脫的篩，經此制度生產出的特首，「可以話自己係普選出嚟，佢可以做到嘅嘢係遠遠勝過而家嘅特首」。往後港府要推行與港人意願相違的政策，只要拋出由「普選」鍍上的認受性，再加以「周融式動員」製造「民意」，便莫之能禦，「喺立法會佢簡直唔使理你！」吳靄儀一提嗓音，模仿那篩選特首之傲慢語調：「『我係150萬人選出嚟，你係分區乍喎！』你都唔使講嘢呀！你簡直一戙都無！」
吳靄儀直言，這次並非2010年密室談判得來的「增加民主成分」的階段性方案，卻是接受了一套中央着意的、不可逆轉的制度，「點解中央要改善個制度？佢覺得非常之好呀！（中央都好想快啲搞掂普選？）Of Course！唔知邊個咁本事話中央都好願意原地踏步，你就想呀！中央係非常之介意原地踏步，因為你下次又爭？咁咪永無寧日？從中央思維，百分之一百控制香港，就有百分之一百國家安全，係外國勢力無辦法入侵嘅，係好事！」港人若「袋住先」，《基本法》45條便達到，他日要改革選舉機制難過上蜀道，「你用咩力量去改呢？」
泛民「唔准佔中」 一票不能少
當下泛民議員身受各方施壓，被搜被批被抹黑，吳靄儀深感憂惜。面對一片哪門哪黨會否佔中的紛爭，她鏗鏘一句：「泛民唔准佔中！」「佢佔中畀人拉咗咪少咗一票！」16年議政生涯，她深明議員之責乃守住立法會防線，「泛民議員如果唔投反對票，去阻截呢個會毁滅香港嘅制度，佢係對唔住香港人」。有意見認為應再辦一次公投，以證明港人不接受「袋住先」，好令議員一票更有民意基礎，然而吳靄儀卻決斷道：「如果我喺立法會，我一定唔會袋住先。如果有啲人話我哋想袋住先你又唔袋，咁你（下屆）唔好再選我。」說來雙目炯然直視，「呢個係良心問題，你睇得到香港會變成點。你今日坐喺呢個位，你要對香港負責，對自己嘅良心負責」。
權力對人之限制，乃誘使人們為己身設限，相信目下只有「袋」與「不袋」，自己把無數可能性抹殺，「唔改而家嘅制度，唔等於原地踏步，因為社會係唔會原地踏步，反而係幫我哋保留一個空間等香港可以發展落去」。
後佔中方向：令政黨「變形」
吳靄儀預計，佔中必然發生，並很大機會悲劇收場；然而，運動精神卻將如離離原上草，迎春風歲歲生長。她認為，佔中有其歷史意義，最重要的成就是改變了港人思維，「以前覺得民主係政府畀、北京畀、議員要幫我哋爭取，而家佔中提出嘅意念係參與，為民主承擔嘅文化」。其次，佔中令抗爭者感受到一種同在共存之親厚，透過建立彼此的連繫拭去民主路上的孤單；第三，佔中是一個充權過程，令民間組織與行動者增強自信，鼓勵更多自發性組織的直接行動。
近月的風聲鶴唳中，文人學者紛紛悲嘆香港「好大鑊」。縱橫政壇和公民社會數十年的吳靄儀也坦言，當下中央政府對港策略是無底線的，「無論係民意又好，國際形象又好，經濟又好，香港係治定亂，佢都似乎無顧忌」。明刀式的執法機關調查，暗箭式的抹黑攻擊，如雪片刮臉。面對龐大的政權暴力，公民社會何以制衡？吳靄儀認為，後佔中應繼續發展佔中所開拓的3個方向：參與思維的覺醒，組織串聯與建立，以及實際行動。她認為，以香港為本位的民主發展，不應只集中於民主政制，還包括經濟政策、土地規劃，與及各種社會議題的思考與改革，「要從香港市民點樣得益嘅方向去思考」。她強調，本土意識並非劃地為牢式的自困香港，或盲目排斥大陸的一切，而是扛起為香港着想的最大責任，思索香港如何挺直背，面對中國、面向世界，「香港要生存，必然要喺世界有位置，要對他人有貢獻。如果我哋對世界無貢獻、對中國無貢獻，我哋係唔會生存得到！」
各種思想之交流派生，需要論壇，而討論後更要實踐。行動要成功，必須結合政治力量——民間組織必須與政黨合作。吳靄儀認為，後佔中急需思索的是如何令政黨「變形」：「民主政制下必然有政黨，政黨好多時令我哋好失望，但我哋嘅做法唔係摒棄政黨，而係令到有更好的政黨出現。我哋點樣改革政黨，令佢哋成為一種健康力量。」民眾大可以不同方式改革政黨，例如直接加入政黨，或經濟支持，甚或恆常監察政黨。她以反高鐵為例，由民間團體游說議員，施加壓力並提供重要資訊，改變議員在議會的取向，繼而影響政府的政策實施。
「作為一個人，你願唔願意自主？」
談到後佔中的未知，人心惶惑。但佔中前已可見犬儒與保守力量在呼嘯噬咬。佔中後，要如何面對來勢洶洶的保守勢力？「傾囉！最重要係你有無一個討論嘅空間。」吳靄儀正色道，「一定要尊重真心反佔中嘅香港人」，「有保守勢力抬頭係咪好事？絕對好！激進勢力抬頭係咪好！好事啦！最唔好係大家都話唔好搞咁多事，阿爺話事，咁就實死！」民主，就是有兼容百川之海量。記者問，在中央無底線的權力下，港人如何維持這個空間？她即時尖銳指正：「你睇你嘅用字！『維持』呢個空間，唔係『維持』！而係要挖開佢嘛！」
有人認為，未來的香港即使有真普選，以港人的現實品性，依樣會選出「愛國愛港」人士，吳靄儀朗笑反駁：「如果係香港人選咗梁振英出嚟呢，咁我梗係好激氣啦！呢個係自己學藝不精！點解俾個咁嘅人選咗上去！但真正嘅普選制度，係你選咗佢出嚟，你都可以拉佢落馬！」普選的重中之重，在於建立公平制度，而非只着重哪人當選。「我哋每個人都有份決定自己嘅命運。呢個社會唔係一個人講，就決定到。我哋有權參與決定香港嘅命運。」港人一向有種「唔好搞咁多嘢」的積習惰性，而後佔中更要推動一種自主的覺醒，「我哋嘅dignity係邊呢？就係我哋前途我哋有份講。你作為一個人，願唔願意自主，自主對你重唔重要？」
「我哋社會係有進步嘅，但成個政府行返轉頭。佢愈做愈壞，你咪喺外圍改囉！」高牆外的人將會變得愈來愈聰明，愈來愈優秀，但他們必須克服宿命式的失敗與絕望，以及無垠時間的歷練，「個秘訣係咩呢？You have to enjoy it！」說着，逼眼的是個曠達的笑。炎陽灼身怎不炙，寒風刺骨誰不冷？但人若尋得意義，便有力撐下去。
人憂慮，佔中會招來中央的暴力鎮壓，因此反對佔中。對此，吳靄儀說，「愈暴力嘅政府咪愈安穩囉，因為你暴力到無人敢郁」。然而，若香港變成暴力社會，人們必定被迫助紂為虐，在暴力政權舉刀之前，已四出限制他人的自由，「咁呢個會係一個點嘅社會？ 如果你咁樣都接受，就永遠只有暴力社會」。她指出，面對暴君，人們可選擇聽暴君說話阻止別人佔中，也可迫使暴君勿對付佔中者，「又或者，我哋預計到暴君會咁做，可唔可以佔得聰明啲？」（圖×黃志東）
文 阿離
圖 黃志東
編輯 方曉盈
沒有留言:
張貼留言