添馬男 - 粉筆字，本來容易抹走

香港蘋果日報   2015年1月5日

發展局局長陳茂波繼續做其鍵盤戰士，周日發表網誌再講out到爆的獅子山下精神，叫大家同舟共濟、彼此放下心中矛盾。但同日另一邊廂在金鐘政總連儂牆下，有十個團體召開記者會，聲討警察迫害用粉筆塗畫牆壁之十四歲少女，不但胡亂控以刑事毀壞罪，兼以保護令為名，將女童拘禁在女童院。究竟而家係邊個唔肯放低矛盾，用盡方法去迫害佔領人士，有目共睹。

塗鴉少女事件令人憤怒，是其手法可恥，充份顯示出警察及律政司淪為政治工具，而且做法野蠻、粗暴，違反了一個文明社會應有標準。如果政府在第二輪政改詻詢前，想營造和諧氣氛，或真正有心化解矛盾，當前急務係好好處理「鎮暴英雄」曾偉雄及其手下。

自上屆政府副總理李克強訪問港大及麗港城，本來一場得分之港大百周年慶典政治公關show，在曾手上變成戒嚴鬧劇後，警察已不再受保安局約束及指揮，曾偉雄公然在立法會發表謬論，在監警會調查證明警察處理不當，仍囂張拒不收回，試問梁振英及新一任保安局長，可以駕馭此人嗎？香港內部武裝力量，除了備而不用的駐港解放軍，就是有準軍事力量兼具民警武警職能之特區警察，而指揮這支武裝力量的，究竟是誰人？英治時代在最後撤出前，保安司一職才由華人政務官黎慶寧出任，他上手乃英籍官員區士培，確保華人警察一哥受控。回歸後近三任保安局長，均非警察系統出身，而是由警察最睇唔起之紀律部隊：入境處高層出任，老董年代由九七前曾任入境處處長之葉劉淑儀做第一任保安局局長，第二任李少光同樣係入境處處長出身、第三任黎棟國則任入境處副處長。李少光還好，不但做過紀律部隊阿頭，轉任問責官員前，出任廉政專員，到李少光落任，黎棟國坐正，曾偉雄點會將佢放在眼內！

曾之上手鄧竟成，講履歷硬淨比曾有過之而無不及，曾任SDU首任華人教官，手上處理過胡錦濤訪港保安，點會將領導人公關show搞成戒嚴狀態？任內三次公開道歉，俾警察內部嘲笑為「Sorry Sir」，佢離職前為道歉行為表白：「這是因為執行警務的先決條件是得到市民信任，如果警務人員犯錯，就會打破彼此間的信任，需要加以重視及以行動回應，以釋除市民的疑慮。」當然警察內部認為佢唔夠guts，但𠵱家望返轉頭，鄧竟成先至係能夠趕上時代之紀律部隊一哥。

曾偉雄矯枉過正，見鄧竟成得不到自己人歡心，於是就一味強硬、一味維護自己人，為此警察最終失去市民信任，𠵱家甚至因其鹵莽、鷹派作風，令政客付出政治代價。他當然可以無風無浪今年中如期退休，但佢留低之手尾就有排搞，一個欠判斷力、全無大局觀，一味強硬之武裝力量指揮，猶如埋了87個政治計時炸彈。

粉筆字，本來好容易抹走！