「有啲劏房好四正」 邱誠武涼薄捱轟

邱副博出位　盛讚劏房靚又抵
香港蘋果日報   2013年1月8日

【本報訊】樓價高，租金貴，基層家庭需入住環境惡劣的劏房。運輸及房屋局副局長邱誠武昨承認，政府無全面掌握劏房數據，但指部份劏房無違規，不會全面取締，又「美化」劏房居住環境，「有啲劏房劏得好四正，做得幾靚！」他更指有意見認為劏房有存在價值，可為收入家庭提供較便宜的市區居所。多名立法會議員批評邱涼薄，變相默許劏房存在。

立法會房屋事務委員會昨討論本港劏房情況。運輸及房屋局副局長邱誠武發言時稱，社會有意見認為劏房有存在價值及社會需求，可為低收入家庭提供一個較便宜的市區居所，所以政府視保障劏房住戶安全為當務之急，不會全面取締。

邱誠武言論引起立法會議員炮轟，指他默許劏房存在。人民力量立法會議員黃毓民指，不少劏房居民水深火熱，「佢哋住喺劏房度，日日提心吊膽，如果你係有心解決呢啲問題，你冇可能到今日為止都冇呢啲所謂劏房嘅具體數字」。

街工梁耀忠要求政府盡快制訂長遠取締劏房的政策，又批評邱誠武指劏房有存在價值，傷透基層市民的心，「呢句說話真喺傷透市民嘅心，等如有頭髮邊個想做癩痢？你竟然話租金平、方便返學返工所以要住喺劏房，問題在於你冇其他選擇，唔通叫佢瞓街？官員竟然咁講說話，完全係鐵石心腸、冇良心！」

多次「美化」居住環境

工業界林大輝批評邱誠武多次美化劏房的居住環境，「政府令我恍然大悟，我哋理解嘅劏房居住環境非常之惡劣、同埋充滿危險，冇安全感，應該取締同改善，但政府竟然講有市場價值，存在必要，令我覺得上咗一課好寶貴嘅通識教育」。會上通過無約束力動議，要求政府提供全港居住劏房的住戶數目、家庭人數及單位數目，以及長遠要取締劏房。

邱誠武反駁，指部份劏房可以短期滿足市民住屋需要，「我見過一啲劏房居民，有人符合上公屋資格，但佢哋寧願喺市區住。有啲未符合上公屋資格，都要搵地方住，所以有的劏房滿足呢班人需求。」青年拒當樓奴運動成員唐耀強，直斥邱誠武言論不人道，「叫佢去住一排，睇吓有乜感受！」。他指劏房是施政失誤下的產物，而特首梁振英上場後又沒有政策協助劏房戶，認為政府應迅速而大量興建公營房屋，安置貧窮劏房戶上樓。

葉一知facebook評論1：劏房滿足部分人住屋需求. 籠屋滿足部分人住屋需求. 寮屋滿足部分人住屋需求. 街邊滿足部分人住屋需求, 天橋底滿足......, 咪住, 街邊和天橋底的露宿者要大力大力掃清, 木屋寮屋唔可以存在, 呢啲唔可以俾人見到, 即使"滿足"部分人住屋需求...., 劏房和籠屋冇所謂, 冇乜人見到的......

劏房滿足部分人住屋需求, 真係2013年庸官最仆街的SOUNDBITE. 咩叫需求? 你迫於去接受叫做需求? 你會唔會話有人在垃圾筒執食物, 便推論"垃圾筒裏的食物滿足部分人食物需求", 繼而推出政策加以鼓勵呀??

需求? 小販的平貨也好有需求, 街邊小吃也好有需求, 做乜掃晒去呀? 益晒領匯同誠哥呀? 真係爆粗.

評論2：在寫本星期通識教室的稿, 談的是人類器官買賣的問題, 邱誠武突然提醒了我: 人類器官買賣滿足了部分人的醫療需求!

這是千真萬確啊! 你香港還不快快立法容許器官買賣??? 我篇文章的結論也要改寫了, 原來在香港, 只要滿足了部分人的XX需求,便可以甚麼問題甚麼道德都置諸不理架! 仲可以當成係政績公開好威威咁講架!!  

潘小濤：當局長也經營劏房，怎會全面取締？！一個僭建的特首，自然也不會全力打擊僭建。因為這個令局長和特首尷尬。 你看，中共滿口滿紙的謊言，才容得下講大話當食菜的人做香港特首。

相關報道：政府統計造假 劏房苦况不見光